Акафист Пророку и Крестителю Иоанну Предтече

Кондак 1

Избранный от лет древних быти Предтечею и Крестителем Спасителя мира Христа Бога, Иоанне богохвальне, прославляюще прославльшаго тя Господа, похвальная восписуем ти, яко большему всех рожденых женами, по плоти ангелу, покаяния проповеднику. Ты же, яко имеяй велие дерзновение ко Господу, от всяких бед свобождай и к покаянию воздвизай нас, любовию тебе зовущих:

Радуйся, великий Иоанне, Пророче, Предтече и Крестителю Господень.

Икос 1

Архангел Гавриил, предстояй пред Богом послан бысть ко иерею Захарии, егда той служа по чину чреды своея, вниде покадити в церковь Господню, и, представ одесную алтаря кадильнаго, благовествоваше о твоем рождестве, великий Иоанне, возвещая Захарии радость и веселие и яко мнози о рождестве твоем возрадуются. Сего ради и мы, дивному о тебе Божию благоволению чудящеся и радующеся, со благоговением в похвалу тебе вопием:

Радуйся, Совета Божия неизреченнаго тайнниче;

Радуйся, дивнаго смотрения Его исполнение.

Радуйся, прежде лет многих пророчеством Исаии проявленный;

Радуйся, вестниче пред лицем Господним, древне прореченный.

Радуйся, предназначенный быти великим пророком Вышняго;

Радуйся, по обетованию Ангела рожденный.

Радуйся, еще во чреве матере твоея Духа Святаго исполненный;

Радуйся, прежде рождества твоего на великое служение освещенный.

Радуйся, неплодства родителей разрешение;

Радуйся, иерея Божия радость и веселие.

Радуйся, дщере Аароновы прозябение;

Радуйся, плод молитвы Богодарованный.

Радуйся, великий Иоанне, Пророче, Предтече и Крестителю Господень.

Кондак 2

Видя Захария явльшагося ему Ангела, смутися, и страх нападе нань, и не верова словесем благовестия его о рождестве твоем: егда же за неверие немотою связан бысть, удивляшеся преславному чудеси, всем сердцем вопия Богу: Аллилуиа.

Икос 2

Разум неуразумеваемый разумети ищуще людие, ждуще Захарию, чудяхуся умедлившу ему в церкви; изшедшу же ему и не могущу глаголати к ним, но токмо помавающу, разумеша вси, яко видение виде в церкви. Мы же, прославляюще дивнаго Творца чудес, Бога, вопием тебе таковая:

Радуйся, благий виновниче безгласия отча;

Радуйся, слез матере твоей пременение на радость.

Радуйся, тоя поношения в людех отъятие;

Радуйся, великое рождшим тя утешение.

Радуйся, яко в шестый месяц о зачатии твоем Пресвятая Дева Мария в Назарете от Ангела известися;

Радуйся, яко о рождестве твоем мнози возвеселишася.

Радуйся, яко имя благодатное от Ангела нареченное, получивый;

Радуйся, яко именем твоим немотствование отца твоего Захарии разрешися.

Радуйся, яко Имя Божие о тебе отцем твоим благословися;

Радуйся, яко о чуднем рождестве твоем страх и удивление в окрест живущих явися.

Радуйся, яко по всей стране Иудейстей о дивнем рождестве твоем возвестися;

Радуйся, яко тобою спасение многим в мире сем явися.

Радуйся, великий Иоанне, Пророче, Предтече и Крестителю Господень.

Кондак 3

Сила Вышняго разреши неплодство заматоревшия во днех своих праведныя Елисаветы: зачат бо тя, славный Предтече Господень, и таяшеся месяц пять, глаголющи: яко тако мне сотвори Господь во дни, в няже призре отъяти поношение мое в человецех. Егда же прия Имущую во чреве Христа, исполнися Духа Свята и возопи гласом велиим: «Откуду мне сие, яко прииде Мати Господа моего ко мне!» с Неюже радующися, взываше Богу: Аллилуиа.

Икос 3

Имеяй предъити пред Господем духом и силою Илииною, еще из чрева матере твоея исполнился еси Духа Святаго, отонюдуже и Пророк дивный показался еси, егда во утробе матере твоея сый, взыгрался еси радощами пришествию Матере Господни. Бога бо познал еси носима в ложеснах Благодатныя и Того матерниим гласом проповедал еси: подобаше бо Божественных вещей преславным быти началом. Сему убо благоговейно удивляющеся, с радостию тебе вопием:

Радуйся, еще во утробе матерней предпославшаго тя Господа чудным веселием предъявивый;

Радуйся, яко тебе ради и матери твоей Елисавете воплощение Христово открыся.

Радуйся, яко и та исполнися Духа Свята;

Радуйся, яко и она предивна пророчица явися.

Радуйся, яко от нея Пресвятая Дева Мария Блаженною в женах наречеся;

Радуйся, яко тою Она и Материю Господа наименовася.

Радуйся, яко и безсеменный плод Тоя Благословенным пронаречеся;

Радуйся, Премудросте Божественныя предъявление.

Радуйся, святаго супружества благословение;

Радуйся, неплодных ложесн дивное прозябение.

Радуйся, рождением твоим удививый люди;

Радуйся, светлый Слова гласе.

Радуйся, великий Иоанне, Пророче, Предтече и Крестителю Господень.

Кондак 4

Бурею сомнения смущенный, иерей Захария не можаше, по словеси ангельскому, проглаголати. Егда же по рождестве твоем, Предтече Господень, написа благодатное имя твое, абие отверзошася уста и язык его, и глаголаше, благословя Бога, и пророчества, глаголя: Благословен Господь Бог Израилев, яко посети и сотвори избавление людем Своим, и ты, отроча, Пророк Вышняго наречешися, поя Тому: Аллилуиа.

Икос 4

Слышаша окрест живущии людие о преславном и чудном рождестве твоем, со удивлением глаголаху в себе: «Что убо отроча сие будет?» Мы же тя, преславный Предтече Господень, яко больша всех рожденных женами, достойно чтуще, ублажаем сице:

Радуйся, от зачатия твоего благодатных явлений исполненный;

Радуйся, в рождестве твоем Богом прославленный.

Радуйся, во младенчестве твоем от отца твоего Пророком Вышняго нареченный;

Радуйся, во отрочестве твоем Духом Святым просвещенный и укрепленный.

Радуйся, Бога воплотившагося сродник по плоти бывый;

Радуйся, от Бога высокое звание Предтечи и Крестителя приемый.

Радуйся, заре, свет новый миру возвестившая;

Радуйся, звездо, путь, ведущий ко Христу, осветившая.

Радуйся, деннице Солнца незаходимаго;

Радуйся, светильниче Света неугасаемаго.

Радуйся, путь грядущему Христу уготовляяй;

Радуйся, ангела и человека в себе являяй.

Радуйся, великий Иоанне, Пророче, Предтече и Крестителю Господень.

Кондак 5

Богопротивное веление беззаконнаго детоубийцы Ирода изгна тя из дому отча в непроходную пустыню, носима материю, Предтече Господень, идеже и пребывал еси до дне явления твоего ко Израилю ядый акриды и мед дивий и Богу вопия: Аллилуиа.

Икос 5

Видяще дивное Божие о тебе промышление, Иоанне богохвальне, яко от младенческих пелен постническаго жития любитель показался еси, отонюдуже волею Вышняго послан был еси проповедати людем грядущее во Христе спасение. Сего ради со удивлением и любовию тебе взываем:

Радуйся, яко, еще младенец сый, царя Ирода устрашил еси;

Радуйся, от напрасного убиения тем десницею Вышняго сохраненный.

Радуйся, пустыни шипок благовонный;

Радуйся, высотою подвигов твоих всех удививый.

Радуйся, праваго пути верный указателю;

Радуйся, чистоты и целомудрия предивный хранителю.

Радуйся, евангельскаго самоотвержения образе совершенный;

Радуйся, монашествующих покрове и утверждение.

Радуйся, богословствующих умов просвещение;

Радуйся, грешным милосердия Божия двери отверзаяй.

Радуйся, кающимся грешником от Господа прощение подаваяй;

Радуйся, плоды достойны покаяния творити помогаяй.

Радуйся, великий Иоанне, Пророче, Предтече и Крестителю Господень.

Кондак б

Проповедник славный ты, божественный Предтече, показался еси в пустыни Иорданстей во дни явления Христа Бога миру. Сего бо, Грядущаго к тебе, показал еси людем, глаголя: се, Агнец Божий, вземляй грехи мира; Егоже мы верою познавше, поем Ему: Аллилуиа.

Икос 6

Возсиял еси свет истины, Иоанне богопросвещенне, всем являяй Славы Отчия Сияние, явльшееся плотски нас ради. Вопиял бо еси в пустыни людем: «Покайтеся, приближи бо ся Царствие Небесное: сотворите плоды достойны покаяния. Се бо грядет по мне, Иже крестит вы водою и духом». Сего ради похвальная тебе вопием:

Радуйся, пришествия Мессии возвестителю;

Радуйся, путей Господних уготователю.

Радуйся, ветхия и новыя благодати ходатаю;

Радуйся, пророков пределе и начало апостолов.

Радуйся, гласе Слова благознаменитый;

Радуйся, покаяния проповедниче велегласный.

Радуйся, многих сынов Израилевых ко Господу обративый;

Радуйся, люди совершенны Господеви уготовавый.

Радуйся, фарисеев и саддукеев дерзновенно обличивый;

Радуйся, плоды достойны покаяния творити научивый.

Радуйся, просвещения духовнаго указателю;

Радуйся, ищущим предстательства твоего неусыпный заступниче.

Радуйся, великий Иоанне, Пророче, Предтече и Крестителю Господень.

Кондак 7

Хотящу от тебе креститися Господу Иисусу, Иоанне богоблаженне, глаголал еси: «Аз требую Тобою креститися», обаче повинуяся, рекшу Тому: «Остави ныне», воздвигл еси десницу твою на главу Его и, крестив не требующаго очищения, вопиял еси: Аллилуиа.

Икос 7

Новую подая благодать креститися изволивый от тебе Господь, сподоби тя Духа пришествие видети и глас Отческий с небесе, свидетельствующий Его Сыновство, слышати. Отнюдуже в Триех Лицех Единому Богу поклонятися нас научил еси, Егоже бренными прославляюще устнами, в похвалу сия тебе приносим:

Радуйся, Троическаго Богоявления первый проповедниче;

Радуйся, в Триех Лицех единаго Бога истинный поклонниче.

Радуйся, Духа Святаго в виде голубине яснозрителю;

Радуйся, снисхождения Его от Отца на Сына свидетелю.

Радуйся, гласа с Небесе от Бога Отца слышателю;

Радуйся, явление любве Отчи к Сыну созерцателю.

Радуйся, Сына Божия избранный Крестителю;

Радуйся, воли Его святыя исполнителю.

Радуйся, славнаго служения спасению рода человеческаго ревностный рачителю;

Радуйся, великаго Таинства Крещения первый совершителю.

Радуйся, Божественныя радосте вестниче;

Радуйся, Новаго Завета первый учителю.

Радуйся, великий Иоанне, Пророче, Предтече и Крестителю Господень.

Кондак 8

Странное и неизреченное смирение воплотившагося Бога Слова видев, богоблаженне Крестителю, Божественную Свою главу тебе приклонивша и рабское крещение приемша, ты и сам весь исполнился еси великого смирения. Испроси убо боголюбезную добродетель сию и нам, одержимым гордостию, яко да от сердца смиренна вопием ему: Аллилуиа.

Икос 8

Весь благодатных дарований исполненный, течение временныя жизни скончавая, Иоанне богознамените, всех поучал еси исполнением Закона и покаянием благо угождати Господеви. Сего ради благодарственное хваление тебе, великому учителю истины, воспеваем:

Радуйся, Закона и оправданий Господних насадителю;

Радуйся, Иродова беззакония обличителю.

Радуйся, о исправлении того рачителю;

Радуйся, правды ради темничное заключение и узы претерпевый.

Радуйся, за истину во главу усеченный;

Радуйся, яко тело твое от учеников твоих честне погребеся.

Радуйся, яко Божиим смотрением глава твоя нетленна соблюдеся;

Радуйся, яко та на утешение, освящение и цельбы христианом дадеся.

Радуйся, яко и деснице твоей, крестившей Господа, вернии благочестне покланяются;

Радуйся, яко от тебе многая чудеса теми доныне совершаются.

Радуйся, яко тобою вернии от страстей безчестия избавляются;

Радуйся, яко тобою грешнии к покаянию воздвизаются.

Радуйся, великий Иоанне, Пророче, Предтече и Крестителю Господень.

Кондак 9

Все естество ангельское удивися высоте служения твоего, и Церковь благоговейно прославляет тя, яко друга Христа Бога, предшедшаго пред Ним духом и силою Илииною. Ревнуя бо по истине, дерзновенно обличал еси фарисеев и беззаконнаго Ирода, от него же и мученическую кончину приял еси. Покланяющеся убо честней главе твоей, молимся ти: избави нас от страстей безчестия, да чистым сердцем и усты поем: Аллилуиа.

Икос 9

Ветийство всякое земнородных не довлеет достойно восхвалити тя, Иоанне богохвальне: тебе бо уста Христова похвалиша, высша пророков и больша всех рожденных женами тя наименоваша. Отнюдуже достойную похвалу принести тебе недоумевающе, вопием ти сицевая:

Радуйся, Церкве Христовы великая славо;

Радуйся, Ангелов предивное чудо.

Радуйся, праотцев радость и прославление;

Радуйся, пророков высокая похвало.

Радуйся, апостолов богосветлый венче;

Радуйся, святителей велелепая красото.

Радуйся, мучеников в новой благодати начало;

Радуйся, преподобных совершение.

Радуйся, праведных удобрение;

Радуйся, девственников и постников основание.

Радуйся, всех христиан великое утешение;

Радуйся, яко от всех христианских родов имя твое прославляется.

Радуйся, великий Иоанне, Пророче, Предтече и Крестителю Господень.

Кондак 10

Спасти мир Пришедшаго во плоти Христа Бога благовестил еси и сущим во аде, якоже бо денница, предходящая солнцу, осветил еси во тьме и сени смертной седящих. Отнюдуже вскоре Господом изведен был еси со всеми от века праведными, поя Ему, яко Избавителю и Победителю смерти: Аллилуиа.

Икос 10

Стена еси и прибежище спасительное всем, молитвенно к тебе притекающим, божественный Иоанне. Сего ради песньми похвальными ублажаем тя сице:

Радуйся, мощный заступниче наш и верный от бед хранителю;

Радуйся, злостраждущих от духов злобы скорый помощниче и избавителю.

Радуйся, неплодствующим благословение, от Бога низпосылаяй;

Радуйся, притекающих к тебе с верою от треволнения страстей избавляяй.

Радуйся, во вражде сущих скоро умиротворяяй;

Радуйся, во всякой нужде и печали усердно притекающим к тебе скорую помощь подаваяй.

Радуйся, благотекущих от самообольщения и прелести изъимаяй;

Радуйся, вручающим себе твоему ходатайству в час смертный помогаяй.

Радуйся, любящих тя от воздушных мытарств предстательством твоим свобождаяй;

Радуйся, почитающих славную память твою вечныя жизни молитвами твоими сподобляяй.

Радуйся, нищих и вдовиц и сирот заступление;

Радуйся, по Бозе и Богородице христианом прибежище и упование.

Радуйся, великий Иоанне, Пророче, Предтече и Крестителю Господень.

Кондак 11

Пение всякое не довлеет по достоянию доблестей твоих восхвалити тя, Крестителю Господень. Но мы, любовию понуждаеми, дерзаем воспевати величия твоя, еже милостивно приими от нас, первостоятелю у Престола Пресвятыя Троицы, и моли свободитися нам от всякия скверны греховныя, да чистым сердцем и устнами поем Богу: Аллилуиа.

Икос 11

Светильника Света неприступнаго и всесветлых благодатных дарований всего исполнена тя, Иоанне богопросвещенне, ведуще, радостно приносим ти таковая:

Радуйся, самовидче озарившаго тя свыше Божественнаго Света;

Радуйся, светом добродетелей твоих прославивый Бога.

Радуйся, Пресвятыя Троицы велелепую славу явивый;

Радуйся, правый и дивный путь к Небеси показавый.

Радуйся, и сущим во аде Бога, явльшагося во плоти благовестителю;

Радуйся, душ праведных, от века в преисподней держимых, возвеселителю.

Радуйся, Владыки Христа Бога друже искренний;

Радуйся, явивый миру Свет истинный.

Радуйся, светозарное света евангельскаго сияние;

Радуйся, рода христианскаго прославление.

Радуйся, Совета Божия исполнение;

Радуйся, яко от восток солнца даже до запад хвально имя твое.

Радуйся, великий Иоанне, Пророче, Предтече и Крестителю Господень.

Кондак 12

Благодати тезоименитый Крестителю Господень и тою обогатився, победоносец преславный показался еси: победил бо еси враги и всякую злобу и великое служение твое мученическим подвигом запечатлел еси. Ныне же, предстоя Престолу Царя царствующих, моли Его даровати всем верным победы на враги и во всем благопоспешение, в добродетелех же благодатное укрепление, поющим Ему: Аллилуиа.

Икос 12

Поюще Бога, дивно в тебе прославльшагося, хвалим тя, богоблаженне Крестителю, яко искренняго друга Христова, прославляем великия подвиги твоя, ублажаем мученическую кончину твою и сицевая радостно вопием ти:

Радуйся, вселенский апостоле и Новаго Завета первомучениче;

Радуйся, явлением Христа на земли открывшагося Царствия Небеснаго первый проповедниче.

Радуйся, языков Божественное призвание предвозвестивый;

Радуйся, безвестная и тайная премудрости Божия миру явивый.

Радуйся, божественными деянии плодоносен паче иных явивыйся;

Радуйся, сущим во аде Христа грядущаго, благовестителю.

Радуйся, яко светом дел твоих прославися Отец Небесный.

Радуйся, яко о памяти твоей Церковь Христову веселиши неизреченно;

Радуйся, яко ныне вечнаго наслаждаешися веселия изобильно.

Радуйся, божественными лучами Трисолнечнаго Света осияваемый;

Радуйся, яко со безплотными Трисвятую песнь Богу немолчно вопиеши.

Радуйся, яко ныне, зерцалом разрешшимся, несредственне зриши Святую Троицу.

Радуйся, великий Иоанне, Пророче, Предтече и Крестителю Господень.

Кондак 13

О великий и преславный Предтече и Крестителю Господень Иоанне, приими от нас ныне приносимое тебе моление и твоими богоприятными к Богу молитвами избави нас от всякаго зла, и вечныя изми муки, и наследниками Царствия Небеснаго соделай, да во веки поем Богу: Аллилуиа.

Этот Кондак читается трижды, затем 1-й Икос «Архангел Гавриил…» и 1-й Кондак «Избранный от лет…».

 

Молитвы Пророку и Крестителю Иоанну Предтече

1-я молитва

Крестителю Христов, проповедниче покаяния, кающагося не презри мене, но совокупляяся с вои Небесными, молися ко Владыце за мене недостойнаго, унылаго, немощнаго и печальнаго, во многая беды впадшаго, утружденнаго бурными помыслы ума моего: аз бо есмь вертеп злых дел, отнюд не имеяй конца греховному обычаю, пригвожден бо есть ум мой земным вещем: что сотворю, не вем. И к кому прибегну, да спасена будет душа моя? Токмо к тебе, святый Иоанне, благодати тезоимените, яко тя пред Господем по Богородице вем больша быти рожденных всех, ибо ты сподобился еси коснутися верху Царя Христа, вземлющаго грехи мира, Агнца Божия. Егоже моли за грешную мою душу, да поне отныне, в первыйнадесять час, понесу тяготу благую и прииму мзду с последними.

Ей, Крестителю Христов, честный Предтече, крайний Пророче, первый во благодати мучениче, постников и пустынников наставниче, чистоты учителю и ближний друже Христов, тя молю, к тебе прибегаю: не отрини мене от твоего заступления, но возстави мя падшагося многими грехи; обнови душу мою покаянием, яко вторым крещением,понеже обоего начальник еси: крещением омываяй прародительный грех, покаянием же очищаяй коегождо дело скверно; очисти мя грехами оскверненнаго и понуди внити, аможе ничтоже скверно входит, во Царствие Небесное. Аминь.

2-я молитва

Святый Предтече и Крестителю Христов Иоанне! Проповедник сый покаяния, кающихся не презри нас, но молися ко Владыце Христу за нас, недостойных рабов, унылых, немощных, во многия грехи впадших. Смерти убо чаем, о гресех же наших николиже поболехом и о Царствии Небеснем не попекохомся: но не презри нас, Крестителю Христов, честный Предтече, болий рожденных всех, постником и пустынником наставниче, чистоты учителю и ближний друже Христов. Тя молим, к тебе прибегаем: не отрини нас, просящих твоего заступления, обнови души наша покаянием, еже есть второе крещение: твоим ходатайством пред Господем испроси нам очищение грехов. Уста недостойная вопиют к тебе, и душа смиренная молится, сердце сокрушенное из глубины воздыхает: простри пречистую твою десницу и защити нас от враг видимых и невидимых. Ей, Господи Иисусе Христе! Молитвами святаго Иоанна Крестителя Твоего, изряднее же Пречистыя Твоея Матери, Владычицы нашея Богородицы, спаси нас, грешных рабов Твоих, кающихся о гресех. Ты бо еси Бог кающихся, и на Тя, Спасителя, возлагаем надежду, славяще Пресвятое Имя Твое, со Безначальным Твоим Отцем, и со Пресвятым и Благим и Животворящим Твоим Духом, ныне и присно и во веки веков.

Канон Пророку и Крестителю Иоанну Предтече

Глас 8

Песнь 1

Ирмос: Истрясшему в мори мучительство фараоне и Израиля сушею наставльшему поим Христу, яко прославися во веки.

Пустыни красное овча, Захариин плод и Елисаветино паче надежди прозябение, предповелевает верным торжествовати честную его память.

О, рождения, исполнена крове! О, пира мерзка! Убийством бо пиянство Ирод раствори, трапеза же его скверноубийства горькаго исполнися.

Обличившаго Ирода беззаконнующа, вернии, и отсечение главы претерпевша, воспоим Крестителя, яко за ревность Божию умерщвлена.

Богородичен: Неописаннаго Бога Слова, всего всельшася в Тя, родила еси. Чистая Богородительнице, сугуба Того, яко едина суща Сына, воплощенна из Тебе неизреченно.

Песнь 3

Ирмос: Несть свят, яко Господь, и несть праведен, яко Бог наш, Егоже поет вся тварь: несть праведен, паче, Тебе, Господи.

Болий не воста в рожденных женами Иоанна, взываше Христос Истина: во утробе бо позна создание Создавшаго, проповедаше матерним гласом.

Перстом, первее, показав Агнца и языком, второе, Ирода обличил еси, главою же, третие, источаеши чудеса от зданна сосуда нам.

Рождение славно, Крестителю Христов, и житие твое непорочно, и предъизшествие честно, и показание странно, смерть честна и погребение славно.

Богородичен: Бог Сый, Сам Себе истощил еси, Единородне, да спасеши, яже создал еси, ихже ради вочеловечился еси, воплощся от Девы, и, все мое пременив естество, привел еси Твоему Родителю.

Седален, глас 8.

От неплодове просияв судом Божиим и узы разрешив языка отча, показал еси солнце, денницу озаряющее, и людем в пустыни Зиждителя проповедал еси, Агнца, вземлющаго мира грехи. Темже ревностию царя обличил еси, в преславную главу твою усечен быв, приснопамятне, Иоанне всехвальне, молися Христу Богу согрешений оставление даровати празднующим любовию святую память твою.

Слава, и ныне, Богородичен:

Яко Деву и едину в женах, Тя, без Семене рождшую Бога плотию, вси ублажаем, роди человечестии: огнь бо вселися в Тя Божества, и яко Младенца млеком питаеши Зиждителя и Господа. Тем, ангельский и человеческий род, достойно славим пресвятое рождество Твое и согласно вопием Ти: моли Христа Бога согрешений оставление даровати покланяющимся верою пресвятому рождеству Твоему.

Песнь 4

Ирмос: Из горы приосененныя, Слове, пророк, единыя Богородицы, хотяща воплотитися боговидно усмотри и со страхом славословяше силу Твою.

Уяснил еси нам Христово Царство, показал еси людем пути покаяния и Ирода обличил еси беззаконнующа, великий проповедниче, Иоанне мудре.

Не терпя, Крестителю, Ирод обличения, победися гневом, и завистию, и горестию; и соблюдаше время рождения, в неже усече главу твою, проповедниче Христов.

Веселися, Крестителю, да играет дух твой: обличаеши бо и тамо безбожнаго Ирода и сущим во аде проповедуеши душам, глаголя: спасение наше приближися.

Чудится земля твоему житию, Иоанне, проповедует небо неправедное твое заколение, и сказует множество добродетелей твоих Церковь, воспевающи.

Богородичен: Родився от Матере, Девы Непорочныя, сохранил еси чисту по рождестве, Иже в мое существо Весь облекся, греха кроме.

Песнь 5

Ирмос: От нощи неведения боговедением просветивши концы, просвети мя утром человеколюбия Твоего, Господи.

Пустынное овча и вселенной стяжание Предтеча днесь готовит духовную трапезу нам.

Сластей раба и законов преступника, обличил еси, Иоанне, Ирода, Иродиады горькаго рачителя.

Иродиада пляшет, Иоанн вяжется и закапается. О, пиянства Иродова! О, несмысльства души его!

Богородичен: Радуйся, Божественная Горо, от Неяже Камень отсечеся без рук, Пречистая, усырившися Богу и Слову, Всенепорочная, плотию.

Песнь 6

Ирмос: Якоже пророка избавил еси из глубины преисподния, Христе Боже, и мене от грехов моих избави, яко Человеколюбец, и управи живот мой, молюся.

Усечение честныя и всехвальныя твоея главы, Предтече Христов, почитающе, славим твою приснохвальную и всемирную память, преблаженне.

О, сквернаго гощения! О, горькаго рождения! О, пиянства сквернаго Ирода беззаконнаго! Содержим бысть к беззаконию и обличаемь, Пророка убити поучавается.

Плясавши новая египтяныня посреди пира сквернено, главу испроси, сея обличившую родительницу и Иродову наложницу.

Богородичен: Иже ныне Сын Девы, первее Сын Отеч показася, не ин разумеваемь, от видимаго, аще и пребысть един во обою совершен.

Кондак, глас 5:

Предтечево славное усекновение смотрение бысть некое Божественное, да и сущим во аде Спасово проповесть пришествие. Да рыдает убо Иродия, беззаконное убийство испросивши: не закон бо Божий, ни живый век возлюби, но притворный, привременный.

Икос:

Рождение Иродово всем явися непреподобно, егда посреди питающихся глава постящагося предложися, якоже снедь: радости совокупися печаль, и смеху растворися горькое рыдание, яко главу Крестителеву на блюде нося, пред всеми вниде, якоже рече, отроковица. И клятвы ради рыдание нападе на вся возлежащия тогда с царем: не бо обвесели онех, ниже Ирода самого. Рече бо: оскорбеша печалию не истинною, но притворною, привременною.

Песнь 7

Ирмос: В начале землю основавый и Небеса словом утвердивый, благословен еси во веки, Господи, Боже отец наших.

Закон Божий проповедуя, Иоанн злочестиваго не убояся Ирода беззаконнующаго уцеломудрити: огнь бо бе в нем греха его.

О, главы, ясно законополагающия и от земли Ироду провозглашающия: не достоит тебе беззаконнующу багряницу носити, яко мучительскую одежду.

Оружии скверными беззаконный Ирод вооружився, с клятвою исполняше беззаконие, гощения пиянство имея тамо, своинствующее тому.

Богородичен: Безплотен сый — непреложно воплотися; Безлетен сый — во времени познася от Девы, всех Зиждитель, несмесно пребыв, якоже бе, и быв, якоже не бе.

Песнь 8

Ирмос: На горе святей прославльшася и в купине огнем Приснодевы Моисеови тайну явльшаго, Господа пойтеи превозносите во вся веки.

Проповедавый Христово пришествие сущим во аде, верою возвещая, болезни решаяй приходит Господь славы, Егоже превозносим во вся веки.

В темнице тя затвори Ирод, Иоанне, втораго Илию, и, железными узы связав, уби, покаяния и Царствия вернаго священнопроповедника.

О, трапезы, крове исполненныя! О, снедей, убийством растворенных! О, пира, исполнена суетства! О, безчеловечия и скверноубййства Ирода беззаконнаго!

Богородичен: Горе весь и доле весь, Слове, в недрех Отчих и Матере Твоея, весь Бог и весь естеством Человек, един Ипостасию и сугуб естеством еси, Милостиве.

Песнь 9

Ирмос: Проявленное на горе законоположнику во огни и купине рождество Приснодевы в наше, верных, спасение песньми немолчными величаем.

Паки Иезавель ликует на Илию, паки египтяныня Иосифа ищет, Пророка же и Крестителя Спасова — ныне явльшаяся Иродиада сквернавая.

Во главу усечен быв, Иоанне, от Ирода, сущим в аде душам послался еси проповедати Грядущаго и тех спасти всех, прежде скончавшихся верных от Адама.

Светильник Света и глас Слова сый, проповедник Агнца Божия, пустынное овча, Иоанне, честный мучениче Господень, моли спастися поющим тя.

Богородичен: Едина в женах по рождестве явилася еси Дева, едина в женах Ты Богородительница показалася еси, едина разрешила еси от болезни Еву и первородную изсушила еси клятву.

Светилен.

Во пророцех больша познана и апостол предъизбранна бывша, песньми похвальными венчаем Предтечу благодати: во главу бо усечен бысть закона ради Господня.

Слава:

Скверный Ирод чистоты садителю, тебе, Крестителю Спасов, главу усече льстивне, обличений же твоего языка посещи никакоже возможе.

И ныне, Богородичен:

Иже клятву мирскую Божественным рождеством Твоим, Чистая, потребльши, стадо, Тебе молящееся верно, от всяких бед избави молитвами Твоими Отроковице.

Тропарь Пророку и Крестителю Иоанну Предтече

ТРОПАРЬ, ГЛАС 4

Первее нераждающая, неплоды, возвеселися: се бо зачала еси Солнца светильника яве, просвещати имуща всю вселенную, слепотою недугующую. Ликуй, Захарие, вопия со дерзновением: пророк Вышняго есть хотяй родитися. (23 сентября/б октября; Зачатие Предтечи и Крестителя Иоанна)

ИН ТРОПАРЬ, ГЛАС 4

Пророче и Предтече пришествия Христова, достойно восхвалити тя недоумеем мы, любовию чтущия тя: неплодство бо рождшия и отчее безгласие разрешися славным и честным твоим рождеством, и воплощение Сына Божия мирови проповедуется. (24 июня/7 июля; Рождество святого Пророка, Предтечи и Крестителя Иоанна)

ИН ТРОПАРЬ, ГЛАС 4

От земли возсиявши, Предтечева глава лучи испущает нетления верным исцелений: свыше собирает множество ангел, доле же созывает человеческий род, единогласную возсылати славу Христу Богу. (24 февраля/9 марта; Первое (IV) и второе (452) обретение главы Иоанна Предтечи)

ИН ТРОПАРЬ, ГЛАС 4

Яко Божественное сокровище, сокровенное в земли, Христос откры главу твою нам, Пророче и Предтече; вси убо сошедшеся в сея обретение, песньми благоглаголивыми Спаса воспоим, спасающа нас от тления молитвами твоими. (25 мая/ 7 июня; Третье обретение главы Предтечи и Крестителя Господня Иоанна (ок. 850))

ИН ТРОПАРЬ, ГЛАС 2

Память праведного с похвалами, тебе же довлеет свидетельство Господне, Предтече: показал бо ся еси воистинну и Пророков Честнейший, яко и в струях крестити сподобился еси Проповеданнаго. Темже за истину пострадав радуяся, благовестил еси и сущим во аде Бога явльшагося плотию, вземлющаго грех мира и подающаго нам велию милость. (7/20 января; Собор Предтечи и Крестителя Господня Иоанна; 29 августа/11 сентября; Усекновение главы Пророка, Предтечи и Крестителя Господня Иоанна)

КОНДАК, ГЛАС 3

Прежде неплоды днесь Христова Предтечу раждает, и той есть исполнение всякаго пророчества: Егоже бо пророцы проповедаша, на Сего во Иордане руку положив, явися Божия Слова пророк, проповедник, вкупе и Предтеча. (24 июня/ 7 июля; Рождество честного славного Пророка, Предтечи и Крестителя Господня Иоанна)

ИН КОНДАК, ГЛАС 5

Предтечево славное усекновение смотрение бысть некое Божественное, да и сущим во аде Спасово проповесть пришествие; да рыдает убо Иродиа, беззаконное убийство испросивши: не закон бо Божий, ни живый век возлюби, но притворный, привременный. (29 августа/11 сентября; Усекновение главы Пророка, Предтечи и Крестителя Господня Иоанна)

Акафист преподобному Алексию,человеку Божию

Кондак 1

Избранный угодниче Христов, свыше нареченный человече Божий, святе Алексие, похвальное пение приносим ти, любовию чтущии твоя подвиги, терпение и многострадание, имиже Богу угодил еси и явился еси равноангелен на земли; ты же, яко имеяй дерзновение ко Господу, молитвами твоими от всяких нас бед свобождай, да зовем ти: Радуйся, человече Божий Алексие, молитвенниче о душах наших.

Икос 1

Ангел земный и человек небесный был еси, Алексие блаженне, от младых бо лет жития твоего чистоту души и тела соблюл еси и Христу любовию усердною последовал еси, Егоже взыскуя, вся красная мира сего оставил еси и достигл еси совершенства духовнаго. Сего ради слышиши от нас сия достодолжныя тебе похвалы: Радуйся, ветхаго Рима рождение; Радуйся, безчадных родителей неплодия разрешение. Радуйся, молитв усердных плод богодарованный; Радуйся, от младенчества на богоугождение свыше предызбранный. Радуйся, в страсе Божием добре воспитанный; Радуйся, Закону Господню верно наученный. Радуйся, о небесных паче, неже о земных, помышлявый; Радуйся, самоотвержение чудное показавый. Радуйся, чистоту девственную Христа ради непорочно сохранивый; Радуйся, обручницу, красотою цветущую, Иисуса ради оставивый. Радуйся, мудрый странниче, отечества горняго взыскавый; Радуйся, Божий избранниче, вся прилоги мира, плоти и диавола победивый. Радуйся, человече Божий Алексие, молитвенниче о душах наших.

Кондак 2

Видев непостоянство красот мира сего, тлению причастных, Алексие богомудре, возлюбил еси блага нетленная вечная, Христом обетованная во Евангелии верным рабом Его; сего ради дом родителей твоих и все богатство их оставил еси, нищету же вольную избрал еси, да Христу угоден будеши и возможеши невозбранно пети Ему: Аллилуиа.

Икос 2

Разумел еси добре, Алексие блаженне, яко живя в мире, в супружестве и богатстве, неудобь обрящеши спасение; темже торжеству брачному приспевшу, ты брака внезапно уклонился еси, предпочитая в девственней чистоте Богу благоугождати. О сем дивимся и тебе зовем хвалебно: Радуйся, Христов любителю, мрежею любве к миру сему неуловленный; Радуйся, Иисусов последователю, плоти угождения избежавый. Радуйся, высотою подвига твоего Ангелы удививый; Радуйся, крепостию произволения твоего демоны посрамивый. Радуйся, град отечествия твоего оставивый, да Вышняго Града наследие обрящеши; Радуйся, в путь далекий и многоскорбный потекий, да пути спасительнаго причастник будеши. Радуйся, нищету самоизвольную себе усвоивый; Радуйся, гладом и жаждею многажды томимый. Радуйся, в молитвах деннонощных пребывавый; Радуйся, слезами умиления лице твое орошавый. Радуйся, терпения столпе непоколебимый; Радуйся, веры адаманте крепкий. Радуйся, человече Божий Алексие, молитвенниче о душах наших.

Кондак 3

Силою Божиею укрепленный, путь далекий совершил еси и града Едеса достигл еси, Алексие достохвальне, в немже, яко един от нищих, пребывал еси в злострадании и нищете, ко храму Божию выну приметаяся и молитвы усердныя со многими слезами принося Христу, Царю и Богу, зовый: Аллилуиа.

Икос 3

Имел еси, святче Божий, небо покровом и землю одром упокоения, рубища же убогая одеянием многоподвижному твоему телу, зноем опаляему и мразом померзаему, емуже ни малаго угождения не попускал еси, да не возобладает плоть над духом твоим, любовию ко Господу пламеневшим. В таковем подвизе твоем едино утешение Христа имел еси, Иже и нам внушает вопити тебе: Радуйся, от запада на восток пришедый взыскати Солнца Правды, Свет Невечерний; Радуйся, Того во глубине твоего боголюбиваго сердца обретый. Радуйся, светильниче Божественнаго сияния, мира концы озаривый; Радуйся, твоими христопоследовательными стопами Едес освятивый. Радуйся, правило веры истинныя; Радуйся, образе нищеты духовныя. Радуйся, в души твоей добродетели высокия возрастивый; Радуйся, целомудрия сокровище драгое сохранивый. Радуйся, Евангелия Христова добрый хранителю; Радуйся, заповедей Иисусовых усердный исполнителю.Радуйся, на земли небесно поживый; Радуйся, Богу совершенно угодивый. Радуйся, человече Божий Алексие, молитвенниче о душах наших.

Кондак 4

Бурю страстей юношеских воздержанием укротил еси, святе Алексие, и постом сугубым увядил еси красоту лица твоего; темже возсия в души твоей нетленная красота благодатнаго безстрастия, благоугодная краснейшему паче сынов человеческих Христу, Емуже во умерщвленнем телеси сладце воспевал еси песнь хвалы и благодарения: Аллилуиа.

Икос 4

Слышав клирик церкве Едесския в видении глас от иконы Богоматере, человеком Божиим тя нарицающ, достойным Царствия Небеснаго, егоже молитва, яко кадило благовонное, восходит пред Лице Божие, и повелевающ ввести тя внутрь церкве от притвора, идеже нищетно пребывал еси, удивися зело таковей святости твоей, Алексие богоблаженне, и введ тя в церковь Господню, ублажаше тя звании сими: Радуйся, Духа Святаго жилище, преукрашенное чистотою; Радуйся, Божия благодати приятелище, сияющее добродетелей красотою. Радуйся, Божия Матере словесы похваленный; Радуйся, Царицею небесе и земли человеком Божиим наименованный. Радуйся, имя новое и таинственное от Владычицы мира получивый; Радуйся, смирением высокая стяжавый. Радуйся, нищетою богатство нетленное снискавый; Радуйся, почесть вышняго звания достойно восприявый. Радуйся, молитв благоприятное кадило; Радуйся, Царствия Горняго ревностный искателю. Радуйся, в притворе церковнем дни и нощи молитвенно провождавый; Радуйся, внутрь храма Божия повелением Богоматере честно введенный. Радуйся, человече Божий Алексие, молитвенниче о душах наших.

Кондак 5

Боготечней звезде уподобился еси, Алексие свято, егда избегая славы человеческия, от Едеса удалился еси во иныя страны, обаче Божиим Промыслом корабль, на немже плыл еси, ко отечественному твоему граду Риму принесеся. Ты же, познав в сем волю Господню тамо тебе подвизатися, притекл еси к дому родителей твоих, и яко един от нищих, у врат его водворился еси, слезами омывая лице твое и вопия ко Господу: Аллилуиа.

Икос 5

Видев тя боголюбивый родитель твой, святе Алексие, странна и нища образом, милосердова о тебе и хижину малу повеле соорудити тебе у врат своего дома, в нейже питаше тя Христа ради, отнюд не познавая в тебе своего сына; ты же, нищетно в доме родительстем пребывая, всякую нужду странническую и поношение нищенское претерпел еси, подвизая ны благохвалити тя сице: Радуйся, мужество великое показавый; Радуйся, в терпении мнозем преуспевый. Радуйся, в доме родителей твоих незнаемь пребывавый; Радуйся, скорбь их о лишении твоем всегда созерцавый. Радуйся, сетования отца твоего слышавый; Радуйся, слезы матере твоея видевый. Радуйся, плач обручницы твоея познавый; Радуйся, сердце твое сими болезненно уязвлявый. Радуйся, поношения и укоризны от слуг родителей твоих незлобно восприявый; Радуйся, биения и заушения от них молчаливое переносивый. Радуйся, за обидевшия тя непрестанно Бога умолявый; Радуйся, самоизволен мученик воистинну бывый. Радуйся, человече Божий Алексие, молитвенниче о душах наших.

Кондак 6

Проповедник евангельския кротости был еси, святе Алексие, образом жития твоего многотерпеливаго всем показуяй, яко вся возможна человеку о укрепляющем Бозе, Егоже силою в немощней плоти великия подвиги совершил еси и многия страдания претерпел еси любве ради Христовы, достойно и праведно воспевая Пресвятей Троице Серафимскую песнь: Аллилуиа.

Икос 6

Возсиял еси в древнем Риме необычайными подвиги твоими, Алексие блаженно, и сими озарил еси благодатно всю Церковь Христову: кто бо не умилится, слыша твое пачеестественное терпение и многая злострадания, в доме родителей твоих восприятая самоизвольно, и како, наследник сый того дома, от слуг его укоризны и раны преносил еси радостно. Сего ради приносим ти от усердия нашего сия песноглашения: Радуйся, великий угодниче Христов, в мире премирно поживый; Радуйся, равноангельный слуго Господень, многоболезненно жизнь твою препроводивый. Радуйся, безчестие в славу себе вменивый; Радуйся, раны на теле твоем терпеливо носивый. Радуйся, ланиты твоя от заушений не уклонивый; Радуйся, плещи твоя на ударения предавый. Радуйся, оплевания христоподражательно принимавый; Радуйся, молчанием на укоризны отвещавый. Радуйся, во Христе утешение едино обретый; Радуйся, воспоминанием крестных страданий Иисусовых скорби твоя услаждавый. Радуйся, велико-душный многострадальче; Радуйся, добропобедный подвижниче. Радуйся, человече Божий Алексие, молитвенниче о душах наших.

Кондак 7

Хотение едино имел еси, человече Божий, еже благоугождати Богу; темже вся временная в уметы вменил еси, и наследник многаго богатства быв, сие оставил еси, нищ и странен пребывая, в родительстем доме непознаваем и зело уничижаем, присно воздыхая ко Господу и слезно моляся, да сподобит тя в стране блаженства вечнаго пети Ему со святыми: Аллилуиа.

Икос 7

Ново и необычайно течение совершил еси жития твоего, святе Алексие, среди мира чуждо мирских пристрастий и всякия скверны греховныя; темже приял еси в души твоей боговедения дар совершен и был еси одушевленный храм Трисияннаго Божества, в немже Христос со Отцем и Духом обитель Себе сотвори, нас же научи звати тебе: Радуйся, Ангелов подобниче и человеков красото; Радуйся, ризу душевную девства чистотою убеливый. Радуйся, в радость Господа твоего вшедый; Радуйся, добровольною нищетою превозвышенный. Радуйся, терпением твоим с многострадальным Иовом сравнивыйся; Радуйся, уничижением твоим евангельскому Лазарю подражавый. Радуйся, болезньми многими здравие души стяжавый; Радуйся, страданьми неисчетными Царствие Христово приобретый. Радуйся, ветхаго Рима благодатное обновление; Радуйся, Церкве Христовы Божественное удобрение. Радуйся, обетовании Иисусовых наследниче; Радуйся, Пресвятыя Троицы таинниче. Радуйся, человече Божий Алексие, молитвенниче о душах наших.

Кондак 8

Странник и пришлец, был еси во граде отечествия твоего, святе, выну взыскуя Вышняго Града, Иерусалима Небеснаго; егдаже приспе время отшествия твоего к Богу, ты на хартии тайну жития твоего начертал еси, в познание твоим родителем, и неослабно пребывал еси в подвизех поста и молитвы, приуготовляяся ко исходу умиленным пением Богу: Аллилуиа.

Икос 8

Весь в Бозе быв, Алексие святе, молитве бывшей на устах твоих, предал еси праведную душу твою в руце Божии мирно и безмятежно, яко уснул еси; смерть бо тебе воистинну упокоение бысть от страданий и подвигов непрестанных, и прохождение от худшаго на лучшее. О таковем блаженнем успении твоем мы радующеся, сия прикладныя тебе приносим глаголы: Радуйся, святче Божий, свято и праведно жизнь земную совершивый; Радуйся, во благоухании святыни сном смертным опочивый. Радуйся, на лоно Авраама Ангелы несенный; Радуйся, пением неземным от святых Небожителей встреченный. Радуйся, венцем безсмертныя жизни от Господа увенчанный; Радуйся, во обители райския со славою восприятый. Радуйся, Пресветлое Лице Владыки Христа выну созерцаяй; Радуйся, Пресвятей Троице Трисвятую песнь немолчно возглашаяй. Радуйся, Создателя горних и дольних молитвами твоими умилостивляяй; Радуйся, весь мир христианский предстательством твоим объемляй. Радуйся, Ангелов и человеков радование; Радуйся, почитающим святую память твою верный ходатаю. Радуйся, человече Божий Алексие, молитвенниче о душах наших.

Кондак 9

Вси людие римстии в трепет приидоша, слышавше глас в соборней церкви града своего, во время Божественныя литургии свыше от олтаря глаголющ и повелевающ поискати тя, человече Божий, да молитв твоих сподобятся. Темже во удивлении и ужасе бывше, молит-венно возопиша они ко Господу, да явит им тебе, Своего избранника, зовуще дивному во святых Своих Владыце: Аллилуиа.

Икос 9

Витийство человеческое не довлеет к похвалению тебе, святе Алексие, свыше похваленному Гласом Божественным, Егоже извещением людие римстии обретоша тя, мертва лежаща на одре, с хартиею на лице, еже сияше солнцеподобными лучами, и благоухание велие исхождаше от многоподвижнаго твоего телесе. Темже обретением твоим обрадовани, царь, святитель и весь народ возгласиша тебе: Радуйся, светлый лучу Трисолнечнаго Света, оживляющаго весь мир; Радуйся, деннице, возшедшая просвещати Церковь Христову многими чудесы. Радуйся, святости и чистоты крине благоуханный; Радуйся, дарований Божественных сокровище. Радуйся, родителем твоим хартиею себе явивый; Радуйся, плач их горестный на сладостный преложивый. Радуйся, седины отца твоего прославлением твоим прославивый; Радуйся, слезы матере твоея благодатно возна-градивый. Радуйся, честную обручницу твою, верность тебе сохраншую, духовно утешивый; Радуйся, весь народ римский обретением твоим зело возвеселивый. Радуйся, исцеления чудесная от святых мощей твоих обильно источивый; Радуйся, на небеси и на земли почесть посмертную достойно восприявый. Радуйся, человече Божий Алексие, молитвенниче о душах наших.

Кондак 10

Спастися хотящим пример благий житие твое, святе Алексие, имже вся ны поучавши отрешатися сует мира, искати же едино на потребу, еже есть богоугождение. Помози убо нам, человече Божий, в сем тебе подражати, укрепи немощное произволение наше, вдохни в нас мужество душевное, украси нас добродетельми и яви быти наследники Царствия Небеснаго, да с тобою на земли живых воспоем Создателю нашему: Аллилуиа.

Икос 10

Царя Небеснаго Христа верный последователь был еси, Алексие блаженне, Егоже Страшному Престолу ныне предстоиши во славе небесней, о нейже мы, земнии и перстнии, ниже помыслити можем; обаче любовию усердною к тебе понуждаеми, мысленно созерцаем тя, горе за ны молящагося пред лицем Божиим, и бренными усты возсылаем ти пение таковое: Радуйся, верно чтущим тя скорый помощ-ниче; Радуйся, молитвенно призывающих тя усердный заступниче. Радуйся, праведниче Господень, Егоже Правда возсия немерцаемо; Радуйся, соль земли, яже никогдаже обуяет. Радуйся, добрыми делы твоими Бога прославивый и человеки удививый; Радуйся, житием твоим Ангелы возвеселивый и духи тьмы посрамивый. Радуйся, Горняго Мира украшение; Радуйся, дольняго мира защищение. Радуйся, Рима славо и похвало; Радуйся, христианскаго рода возвышение. Радуйся, в чудесех просиявый; Радуйся, в милостех неистощимый. Радуйся, человече Божий Алексие, молитвенниче о душах наших.

Кондак 11

Пение надгробное со славою тебе сотвориша, святе Алексие, царь, святитель и весь народ римский, родителем твоим и обручнице твоей, возследующим честному твоему гробу, несенному благолепно в соборную церковь, от негоже чудес множество источил еси: слепии прозираху, разслабленнии укрепляхуся, недужнии здрави бываху прикосновением к мощем твоим святым, во еже всем видящим таковая возглашати Богу: Аллилуиа.

Икос 11

Светло и радостно бысть погребение твое, человече Божий, светел бо лицем возлежал еси во гробе и благоухание сладостное испущал еси от нетленнаго твоего телесе, сими знаменуя светлость немерцающую святыя твоея души, в воню благоухания Христова притекшия и мира Божественнаго преисполненныя, от еяже полноты и в наша души подаждь даяние благодатное, да со утешением духовным тебе возопием: Радуйся, свеще неугасимая, в молитвах к Богу горе возжженная; Радуйся, лампадо златая, елеем милости долу живущих умащающая. Радуйся, алавастре драгий, миро целебное болящим источаяй; Радуйся, реко многоводная чудес. Радуйся, иночествующим наставниче добраго подвига; Радуйся, в мире живущим образе богоугождения. Радуйся, зерцало чистое праведнаго жития; Радуйся, пристанище благотишное по Бозе упование на тя возложивших. Радуйся, врагов невидимых крепкий противоборче; Радуйся, ищущим спасения душевнаго благий споспешниче. Радуйся, от небесных высот к земнородным милостивно приникаяй; Радуйся, чтущих тя прошения скоро исполняяй. Радуйся, человече Божий Алексие, молитвенниче о душах наших.

Кондак 12

Благодать и милость испроси нам у Христа, Царя и Бога нашего, Алексие достохвальне; вемы бо, яко много может молитва твоя пред Лицем Его, и благоуветливо преклоняется Он к молению твоему. Темже усердно к тебе прибегаем и смиренно просим: окорми нас пред-стательством твоим в тихое пристанище Христово и сподоби наслаждатися нетленныя радости святых, немолчно вопиющих славословия песнь Триединому Богу: Аллилуиа.

Икос 12

Поюще подвиги многострадальнаго и предивнаго жития твоего, человече Божий, хвалим, славим и ублажаем тя усердною любовию, яко небеснаго многомощнаго предстателя нашего; ты же, святе, данною ти свыше благодатию нас, грешных и мрачных, освяти, просвети и настави вопити тебе неосужденно: Радуйся, востока незаходимаго присносияющая заре; Радуйся, вселенную твоими чудесы исполнивый. Радуйся, мощами твоими преславно чудотворяй; Радуйся, образми подобия твоего предивная совершаяй. Радуйся, болящих безмездный врачу; Радуйся, скорбящих благий утешителю. Радуйся, унывающих благодатное ободрение; Радуйся, изнемогающих внезапное укрепление. Радуйся, бедствующим на помощь ускоряяй; Радуйся, от жития отходящим заступление твое многомощное являяй. Радуйся, радости духовныя боголюбивым душам подателю; Радуйся, благ временных и вечных усердный нам у Господа просителю. Радуйся, человече Божий Алексие, молитвенниче о душах наших.

Кондак 13

О святый и богопрославленный человече Божий Алексие! Тебе, горе за ны молящемуся пред Престолом Господа Славы, мы грешнии, долу живущии, сие малое приносяще пение, молимся от всея души и от всего помышления: молитвами твоими испроси нам у Христа Бога прощение согрешений и по кончине нашея жизни приятие в блаженныя обители Небеснаго Царствия, да с тобою во веки поем Ему: Аллилуиа.

(Этот кондак читается трижды, затем икос 1 и кондак 1)

Молитвы преподобному Алексию,человеку Божию

Молитва первая

О великий Христов угодниче, святый человече Божий Алексие, душею на небеси Престолу Господню предстояй, на земли же данною ти свыше благодатию различная совершаяй чудеса! Призри милостивно на предстоящий святей иконе твоей люди, умиленно молящиеся и просящие от тебе помощи и заступления. Простри молитвенно ко Господу Богу честнеи руце твои и испроси нам от Него оставление согрешений наших вольных и невольных, в недузех страждущим исцеление, напаствуемым заступление, скорбящим утешение, бедствующим скорую помощь, всем же чтущим тя мирную и христианскую живота кончину и добрый ответ на Страшнем Суде Христове. Ей, святче Божий, не посрами упования нашего, еже на тя по Бозе и Богородице возлагаем, но буди нам помощник и покровитель во спасение, да твоими молитвами получивше благодать и милость от Господа, прославим человеколюбие Отца и Сына и Святаго Духа, в Троице славимаго и покланяемаго Бога, и твое святое заступление ныне и присно, и во веки веков. Аминь.

Молитва вторая

О Христов угодниче, святый человече Божий Алексие! Призри милостивно на нас, раб Божиих (имена), и простри молитвенно ко Господу Богу честнии руце твои, и испроси нам от Него оставление согрешений наших вольных и невольных, мирную и христианскую жития кончину и добрый ответ на Страшнем суде Христове. Ей, угодниче Божий, не посрами упования нашего, еже на тя, по Бозе и Богородице, возлагаем; но буди нам помощник и покровитель во спасение; да твоими молитвами получивше благодать и милость от Господа, прославим человеколюбие Отца и Сына и Святаго Духа и твое святое заступление, ныне и присно и во веки веков.

Тропарь преподобному Алексию,человеку Божию

Тропарь, глас 4

Возвысився на добродетель и ум очистив, к желанному и крайнему достигл еси: безстрастием же украсив житие твое, и пощение изрядное восприим совестию чистою, в молитвах, яко безплотен пребывая, возсиял еси, яко солнце в мире, преблаженне Алексие.

Кондак, глас 2

Дом родителей твоих яко чужд имев, водворился еси в нем нищеобразно: и по преставлении венец прием славы, дивен на земли явился еси, Алексие, человече Божий, Ангелом и человеком радование.